且说宝玉送过了蠡湖、尔霭之后，再看看阿二的病势，见他模模糊糊，闭着眼睛，哼声不绝，连叫他也不回答，知比昨宵加重了，不禁闷上添闷，乱了方寸，惟与阿金、阿珠商议此事。阿金道：“ 日里唔笃去白相，剩我一干子看守俚，俚倒安静格，勿算得十二分糊涂，还问我讨歇两转茶吃，嘴里喊口渴格勒。到仔下晚（ 读慢） 昼三点多钟，渐渐能格勿灵哉，对仔里床说胡话，带累我吓煞快，后来唔笃转仔，胡话倒 说歇，独是格唔哩唔哩，赛过挑仔一副重担实梗，吃力得透气勿转，我看上去，俚格病才勒里势，总要好好能吃几帖重药，发俚出来仔，难末有转机得勒。”宝玉道：“ 比奴懂点笃，故歇俚格病， 看阿是疟疾勒介？”阿金摇头道：“疟疾变仔伤寒格哉，格落勿好呀，加二朝轻夜重，倪勿能勿小心防防 。”宝玉道：“格末今朝一夜天，阿要登个把人看看俚介？”阿金道：“自然要格 ，横势有我搭阿珠两家头，上下半夜，轮流陪俚末哉。”阿珠也说道：“好来好去，船浪登煞不过两夜天哉，倪两家头终好熬格。到仔上海，人手一多，就勿怕哉。大先生， 到底阿要用小火轮拖带佬？”宝玉道：“ 奴心里说勿出格愁杀急杀，恨勿得连夜就转勒里，哪哼好勿用轮船拖带嗄？ 去交代声管船格，叫俚去喊轮船，讲定仔行（ 读杭）情，稍为贵（ 读举） 点倒勿要紧，切勿可以耽误，明朝饭前板要拖带仔勒走格。”阿珠答应，便到后梢交代船家，毋庸多表。